Fridrix Mers Ukrainaga Yevropa Ittifoqining assosiasiyalashgan a’zosi maqomini berishni taklif qildi

Germaniya kansleri Fridrix Mers Ukrainaning Yevropa Ittifoqiga assosiasiyalashgan a’zo bo‘lishini talab qilmoqda va blokni ushbu masalani ko‘rib chiqishga chaqirmoqda. Bu haqda «Bloomberg» agentligi xabar bermoqda.

Nashrning ma’lumotlariga ko‘ra, Mers YEI institutlari rahbarlariga yo‘llagan maktubida bu qadam Ukrainaga to‘laqonli a’zolikni qo‘lga kiritmasdan turib ham blokka integrasiyalashish imkonini berishini ta’kidlagan. Bunday holatda Kiyev rejimi ovoz berish huquqisiz YEI yig‘ilishlarida ishtirok etishi, Yevropa sudiga assosiasiyalashgan sudya hamda Yevroparlamentga o‘z vakillarini tayinlashi mumkin bo‘ladi.

Ushbu tashabbus Chernogoriyada bo‘lib o‘tadigan YEI va G‘arbiy Balkan davlatlari sammiti oldidan ilgari surildi.

Mers, shuningdek, «cheklangan a’zolik» haqidagi takliflarni rad etdi va Ukrainaning YEIga a’zo bo‘lish jarayoni baribir davom etishini alohida ta’kidladi.

Aniqlik kiritilishicha, kansler bu masalani o‘tgan sammitda Vladimir Zelenskiy bilan allaqachon muhokama qilgan.