Fransiya Slovakiyaga qo‘shilib, kelib chiqishi o‘zbekistonlik, ammo Rossiya fuqarosi bo‘lgan milliarder Alisher Usmonovni Yevropa Ittifoqi sanksiyalar ro‘yxatidan chiqarishni so‘ramoqda. Bu haqda muzokaralardan xabardor to‘rt manbaga tayanib, Euronews xabar berdi.
Slovakiya avvaldan Alisher Usmonov va milliarder Mixail Fridmanni Rossiyaning Ukrainaga qarshi urushi munosabati bilan joriy etilgan Yevroittifoq sanksiyalaridan chiqarishni talab qilib kelayotgandi. Endi bu masalada Bratislavani Parij ham qo‘llab-quvvatlamoqda.
Nashr manbalariga ko‘ra, Fransiyaning qarori boshqa a’zo davlatlarda “kuchli norozilik” uyg‘otgan. Yevropa Ittifoqi diplomatlaridan biri Parijning bunday pozisiyasi ortida, asosan, iqtisodiy sabablar bo‘lishi mumkinligini aytgan.
Fransiyaning YEIdagi doimiy vakolatxonasi Parij Rossiyaga nisbatan sanksiyalarning umumiy muddatini uzaytirishni qo‘llab-quvvatlashini bildirgan. Usmonovni ro‘yxatdan chiqarish talabi esa Slovakiya bilan kelishuvga erishish uchun siyosiy murosa sifatida ilgari surilgan.
Usmonovni Yevropa sanksiyalaridan chiqarish masalasi avval ham bir necha bor ko‘tarilgan. Jumladan, 2025 yil fevralda Vengriya Usmonov va uning singlisini sanksiyalar ro‘yxatidan chiqarish taklifini ilgari surgandi. Budapesht sakkiz nafar rossiyalik ro‘yxatdan chiqarilmasa, sanksiyalarni uzaytirishga rozilik bermasligini bildirgan edi.
Ma’lumot uchun, Alisher Usmonov 2022 yil fevralda Rossiyaning Ukrainaga keng ko‘lamli bosqini boshlanganidan keyin EI sanksiyalar ro‘yxatiga kiritilgan.
«Vafot etgan» Bibimaryam tirik ekani tasdiqlandi — Face ID ishga tushdi
Yaponiyada uyqu musobaqasi bo‘lib o‘tadi, unda g‘olib katta pul mukofotiga sazovor bo‘ladi
Sun’iy intellekt qachon "qaytib bo‘lmaydigan nuqtaga" yetishi mumkinligi ma’lum bo‘ldi
