Facebook va Twitter ijtimoiy tarmoqlari Rossiya tuzilmalari bilan bog‘liq bir qator akkaunt va sahifalarni o‘chirib tashladi. Bu haqda har ikkala ijtimoiy tarmoq matbuot xizmatlari xabar berishdi.
Facebook Rossiyaning Internet tadqiqot agentligi bilan bog‘liqligi taxmin qilingan ikkita sahifa va 13 ta akkaunt o‘chirilganligi haqida xabar berdi. Kompaniya ma’lumotlariga ko‘ra, ushbu sahifalar orqali amalga oshirilgan harakatlar Buyuk Britaniya, AQSH, Jazoir va Misrga, shuningdek boshqa ingliz tilida so‘zlashadigan mamlakatlarga va Yaqin Sharq va Shimoliy Afrika davlatlariga qaratilgan.
Facebook aniqlik kiritishicha, tergov Federal qidiruv byurosidan olingan ma’lumotlarga asoslangan. Ijtimoiy tarmoq ma’muriyatining so‘zlariga ko‘ra, ushbu akkauntlar yordamida odamlar "o‘ta so‘lparast qarashlarni singdirishga harakat qilishdi", shuningdek AQSh prezidentligiga asosiy nomzodlar — demokrat Jo Bayden va respublikachi Donald Trampni tanqid qildilar.
Twitter, o‘z navbatida, "platformadagi manipulyasiya uchun" beshta akkauntni blokirovka qilganligini e’lon qildi va ushbu akkauntlar "Rossiya davlat sub’ektlari bilan ishonchli aloqada" ekanligini qo‘shimcha qildi.
Shu bilan birga, matbuot xizmatining xabar berishicha, ushbu sahifalardagi yozuvlar "spam xarakteriga ega bo‘lgan", ularning aksariyati yoqmagan yoki kam miqdordagi layk yoki retvitga ega bo‘lmagan, umuman, akkauntlar Twitter'da kam ta’sir ko‘rsatgan, topilgan va tezda olib tashlangan.
