Evropa Ittifoqi Markaziy Osiyo davlatlari bilan hamkorlikni mustahkamlamoqchi

Evropa Ittifoqi Turkiya orqali Janubiy Kavkaz va Markaziy Osiyo mamlakatlari bilan barqaror va samarali transport, energiya va raqamli aloqalarni o‘rnatishni maqsad qilgan.

Evropa hisobot byurosining Yevrokomissiyaga tayanib xabar berishicha, Yevropa Ittifoqining ushbu sohadagi strategik sarmoyalarni muvofiqlashtirish tashabbusi Yevropa davlatlari, shuningdek, Ozarbayjon, Armaniston, Moldova, Turkiya, Ukraina, Qozog‘iston, Qirg‘iziston, Tojikiston, Turkmaniston va O‘zbekiston vakillari o‘rtasida muhokama qilingan asosiy mavzu bo‘ldi.

"Bu Yevropa Ittifoqining Qora dengiz va Markaziy Osiyo mintaqalariga nisbatan strategik yondashuviga mos keladi”, deyiladi uchrashuv yakunlari bo‘yicha bayonotda.

Muhokamalarda Yevropa Ittifoqi vakili sifatida Tashqi ishlar va xavfsizlik siyosati bo‘yicha Oliy vakil Kaya Kallas, Kengayish bo‘yicha komissar Marta Kos va xalqaro hamkorlik bo‘yicha komissar Yozef Sikela ishtirok etdi.

Ishtirokchilar o‘zaro manfaatli sohalar, jumladan, xavfsizlikni ta’minlash bo‘yicha hamkorlikni chuqurlashtirish tarafdori ekanliklarini tasdiqladilar.

"Evropa va Osiyo o‘rtasidagi asosiy ko‘prik bo‘lgan Qora dengiz mintaqasi xalqaro savdo va g‘alla, energiya va asosiy xomashyo tranzitida muhim rol o‘ynab, uni mintaqaviy va global xavfsizlikning markaziy elementiga aylantiradi", — dedi Yevropa Ittifoqi.

Birinchi uchrashuvda ishtirokchilar xavfsizlik masalalariga e’tibor qaratdilar. Yevropa Ittifoqi a’zo davlatlar va hamkorlarga dengiz salohiyatini oshirish, jumladan monitoring, muhim infratuzilmani himoya qilish va gibrid tahdidlarga qarshi kurashishda o‘z yordamini kuchaytirishga tayyorligini bildirdi.

Ikkinchi yig‘ilishda Yevropa Ittifoqi vakillari Yevropa Ittifoqiga a’zo davlatlar, Qora dengiz mintaqasi, Janubiy Kavkaz va Markaziy Osiyo vazirlari bilan birgalikda mintaqalararo aloqalarni, jumladan, transport va logistika, energetika va raqamli sektorlarni rivojlantirish bo‘yicha ulkan dasturni muhokama qildilar.

Tomonlar hamkorlikning to‘rtta ustuvor yo‘nalishini belgilab oldilar: Transkaspiy xalqaro transport yo‘nalishini (O‘rta yo‘lak) mustahkamlash va kommunikasiyalarni kengaytirish; innovasiyalarni, raqamli savdoni rag‘batlantirish va muhim infratuzilma xavfsizligini ta’minlash uchun yuqori tezlikdagi internetni rivojlantirish; energiya aloqalarini yaxshilash va qayta tiklanadigan energiya manbalarini joriy etishni jadallashtirish; va transchegaraviy savdoni osonlashtirish uchun bojxona tartib-qoidalarini uyg‘unlashtirish va raqamlashtirish.