Eron sport vaziri Ahmad Dunyomaliy milliy jamoaning 2026 yilgi futbol bo‘yicha jahon chempionatida ishtirok etishi hali ham savol ostida ekanini ma’lum qildi, deya xabar beradi Sports.kz.
Uning so‘zlariga ko‘ra, Eron tomoni FIFAdan jamoa o‘yinlarini AQSh hududidan Meksikaga ko‘chirish bo‘yicha so‘rovga haligacha javob olmagan.
«Eron o‘yinlarini AQShdan Meksikaga ko‘chirish bo‘yicha FIFAga yuborgan so‘rovimiz hali ham kuchda, ammo hozircha javob olmadik. Agar bu qabul qilinsa, jahon chempionatida ishtirokimiz kafolatlanadi. Ammo FIFA hali javob bermadi», — dedi Dunyomaliy Anadolu agentligiga bergan intervyusida.
Shu bilan birga, vazir jamoa turnirga tayyorgarlikni davom ettirayotganini ta’kidladi.
«Sport vaziri sifatida, Eron futbol federasiyasi bilan birgalikda milliy jamoani jahon chempionatiga tayyor holda ushlab turamiz. Biroq yakuniy qarorni hukumatimiz qabul qiladi», — dedi u.
Dunyomaliy shuningdek, Donald Trampning Eron terma jamoasi uchun turnirda ishtirok etish xavfsiz emasligi haqidagi bayonotlarini tanqid qildi.
«Tramp juda qarama-qarshi fikrlar bildirmoqda, uning gaplari mutlaqo izchil emas. U axloqiy va etik jihatdan muvozanatsiz bayonotlar qilmoqda. Shu bilan birga, FIFA reglamentlariga ko‘ra, musobaqa o‘tadigan mamlakat xavfsizlikni ta’minlashi shart. Biroq jahon chempionati yaqin, bu muddatda kafolatlar berish masalasi shubhali bo‘lib qolmoqda», — dedi vazir.
Uning ta’kidlashicha, jahon chempionatida ishtirok etuvchi har qanday terma jamoa xavfsizligi FIFA tomonidan kafolatlanishi kerak, aks holda turnir o‘yinlari AQShda o‘tkazilmasligi lozim.
«Bunday sharoitda Eronning AQShda o‘tadigan o‘yinlarda ishtirok etish ehtimoli juda past. Ammo agar tegishli xavfsizlik kafolatlari berilsa, hukumatimiz ishtirok masalasida qaror qabul qiladi», — dedi Dunyomaliy.
Eslatib o‘tamiz, 2026 yilgi jahon chempionati 11 iyundan 19 iyulga qadar AQSH, Meksika va Kanadada bo‘lib o‘tadi. Eron terma jamoasining guruh bosqichi o‘yinlari AQSh hududida o‘tkazilishi rejalashtirilgan.
Shuningdek, vazir siyosiy mavzularga ham to‘xtalib, xalqaro sportdagi «ikki xil standart»lar haqida fikr bildirdi.
«Ma’lumki, Isroil AQSh tomonidan qo‘llab-quvvatlanadi. So‘nggi to‘qqiz oy ichida Eron ikki marta hujumga uchraganiga qaramay, biz ikki xil standartlarni ko‘ryapmiz. Ular G‘azoga ham hujum qilib, 80 mingdan ortiq insonni halok qildi. Bu kabi ikki xil yondashuvlar sportda ham qo‘llanilmoqda. Umid qilamanki, sport olami "fair play" nuqtai nazaridan to‘g‘ri yo‘lni tanlaydi», — dedi u.
Dunyomaliy, shuningdek, xalqaro tashkilotlar va BMT Xavfsizlik Kengashi voqealarga yetarlicha baho bermayotganini ta’kidladi.
«Xalqaro tashkilotlar va BMT Xavfsizlik Kengashi ikki xil standartlarni qo‘llamoqda. Ular yo sukut saqlaydi, yoki jabrlanuvchini ayblaydi. Bu xalqaro hamjamiyat amalda qadrsizlanayotganini ko‘rsatadi», — dedi vazir.
Vazir Turkiyaga Falastinni qo‘llab-quvvatlagani uchun minnatdorlik bildirib, Antaliyada Eron va Nigeriya o‘rtasida o‘tkazilgan o‘rtoqlik uchrashuvi haqida ham fikr bildirdi.
«Bu o‘rtoqlik o‘yinida futbolchilar milliy jamoa libosida maydonga chiqib, bolalar ryukzaklarini namoyish qilish orqali jahon jamoatchiligiga ma’lum bir xabar yetkazishga harakat qildi», — dedi u.
Shuningdek, u Erondagi harbiy harakatlar natijasida sport inshootlari ham zarar ko‘rganini aytdi.
«Ko‘plab sport inshootlarimiz hujumga uchradi. Ilgari xalqaro sportchilar ishtirok etgan ob’ektlar ham nishonga olindi. Shunga qaramay, biz infratuzilmamizni yanada yaxshiroq qilib qayta qurishda davom etamiz», — dedi vazir.
So‘nggida Dunyomaliy mamlakat qarshilikni davom ettirishini ta’kidladi.
«Eron oxirigacha qarshilik ko‘rsatadi va blokada, sanksiyalar hamda embargo saqlanib qolar ekan, bu yo‘ldan qaytmaydi», — deya xulosa qildi u.
Millioner! Husanov “Siti”da jami qancha maosh oladi?
Evropa Ukrainadan voz kechib, Rossiya bilan hamkorlik qilishga harakat qilmoqda
Eron: "Islom inqilobi qo‘riqchilari korpusi tajovuzkor AQShning USS Abraham Lincoln aviatashuvchi kemasiga zarba berdi"
