Bu yil qancha abituriyent OTMga kirish uchun imtihon topshiradi?

Davlat test markazi xabariga ko‘ra, O‘zbekistonda oliy ta’lim muassasalariga o‘qishga kirish uchun abituriyentlardan arizalar qabul qilish nihoyasiga yetdi.

Bu yil 1 million 200 ming o‘g‘il-qiz test imtihonlari topshiradi.

Abituriyentlardan 395 ming 23 nafari joriy yil, 819 ming 209 nafari esa o‘tgan yillar bitiruvchilaridir. Abituriyentlarning aksariyati – 612 ming 530 nafari ta’limning kunduzgi shaklini tanlagan bo‘lsa, sirtqi bo‘limga 565 ming 902 kishi, kechki bo‘limga 27 ming 417 va masofaviy ta’limga 8 ming 383 nafar abituriyent o‘qishga kirish istagida oliy ta’lim muassasalariga o‘z hujjatlarini topshirgan.

Eng ko‘p – 140 ming 797 kishi Qashqadaryo viloyatida istiqomat qiluvchi abituriyentlar hisobiga to‘g‘ri kelgan. Kuchli uchlikdan Samarqand viloyati – 133 ming 610 nafar va Toshkent viloyati – 116 ming 251 nafar abituriyentlari o‘rin oldi.

Shuningdek, Farg‘ona viloyatidan – 109 ming 938 nafar abiturent, Surxondaryo viloyatidan – 106 ming 145, Andijon viloyatidan – 79 ming 235, Namangan viloyatidan – 77 ming 607, Qoraqalpog‘iston Respublikasidan – 75 ming 819, Jizzax viloyatidan – 74 ming 346 nafar, Toshkent shahridan – 68 ming 545, Buxoro viloyatidan – 67 ming 663, Xorazm viloyatidan – 64 ming 351, Navoiy viloyatidan – 54 ming 512 va Sirdaryo viloyatidan – 45 ming 413 nafar abituriyent oliy ta’lim muassasalariga kirish maqsadida o‘z hujjatlarini topshirdi.