Britaniyaning R.A.F. Fairford aviabazasi yaqinida terrorizmda gumonlangan besh kishi hibsga olindi. Voqea bazaning xavfsizligi va ehtimoliy hujum haqida rasmiylar oldindan xabardor bo‘lgan-bo‘lmaganiga oid savollarni yuzaga keltirdi.
27 sentyabr kuni aviabaza yaqinida terrorizmda gumonlanib, besh kishi hibsga olindi. Polisiya hududdagi uchta oq furgonni bomba zararsizlantirish robotlari yordamida tekshirdi. Yaqin atrofda yashovchi 85 ta oila evakuasiya qilindi.
Mahalliy fermer BBC’ga bazaga yaqin dalalarda kapyushon va niqob kiygan bir guruh erkaklarni ko‘rib, polisiyaga qo‘ng‘iroq qilganini aytdi. Buyuk Britaniya mudofaa vaziri Ues Striting fermerning hushyorligini olqishladi, biroq u voqeaning faqat bir qismini ko‘rganini va xavfsizlikka oid operativ tafsilotlarni hozircha oshkor qilib bo‘lmasligini bildirdi.
Voqea aviabaza xavfsizligi hamda gumonlanuvchilar qanday qilib uning hududiga bunchalik yaqinlashgani haqidagi savollarni yuzaga keltirdi. Prezident Donald Tramp hibsga olinganlar “katta zarar yetkazmoqchi bo‘lganini” aytdi va ular avvaldan “tergov ostida bo‘lganini” bildirdi. Biroq Britaniya rasmiylari hujum xavfi haqida oldindan xabardor bo‘lganini tasdiqlamadi.
Fairford bazasi AQShning Eronga qarshi uzoq masofali zarbalarida foydalanilgan. Shu sababli ehtimoliy hujumning Eron bilan bog‘liqligi haqidagi taxminlar ham paydo bo‘ldi. Eron rasmiylari hozircha voqea yuzasidan izoh bermagan.
Britaniya terrorizmga qarshi polisiyasi tergovni davom ettirmoqda. Hibsga olinganlarning shaxsi hozircha oshkor qilinmagan.
Rossiyada bir hafta ichida kasallanganlar soni qariyb 1 millionga yetdi
10 yildan beri qidiruvda bo‘lgan o‘zbekistonlik ISHIDchi, «Choyxona» rahbari AQShga ekstradisiya qilindi
Netanyaxu nutqi paytida zalni tark etgan davlatlar ro‘yxati
