Boliviyaning sobiq prezidenti Evo Morales sobiq davlat rahbari bo‘lgan mashinada sodir bo‘lgan otishmadan so‘ng ichki ishlar vaziri Karlos del Kastilyo va mudofaa vaziri Edmundo Novilyoni ishdan bo‘shatishga chaqirdi.
"Agar prezident Luis Arse bu suiqasdga buyruq bermagan bo‘lsa, unda ishtirok etgan polisiya xodimlari bilan birga ichki ishlar va mudofaa vazirlari Karlos del Kastilyo va Edmundo Novilyoni ishdan bo‘shatib, zudlik bilan ularga qarshi ish qo‘zg‘atishi kerak", deb yozdi u.
Morales, shuningdek, uning mashinasiga o‘q uzganlar polisiya xodimlari ekanligini isbotlovchi video tasvirlarni ham e’lon qildi. Videoda harbiy kiyimdagi bir kishi yig‘ilganlarga o‘t ochgan odamlar polisiya mashinalarini harbiy bazaga haydab, keyin vertolyotlarda uchib ketishganini aytadi.
Yakshanba kuni Morales o‘zining ijtimoiy tarmoqlarida "hukumat ko‘rsatmasi bilan hibsga olishga urinish" deb atagan videoni e’lon qildi. Kadrlarda mashinada Moralesga o‘q uzilgani, haydovchining boshining orqa qismida qon ko‘rinib turganini ko‘rish mumkin. Keyinchalik Morales qotillikka urinish qurboni bo‘lganini yozgan. Ichki ishlar vaziri o‘rinbosari Roberto Riosning aytishicha, polisiyada sobiq prezidentni hibsga olish uchun order yo‘q, rasmiylar voqea yuzasidan tekshiruv o‘tkazadi.
