Birlashgan Millatlar Tashkiloti Rossiya va AQSh prezidentlari Vladimir Putin va Donald Trampning ehtimoliy uchrashuvi uchun Nyu-Yorkdagi shtab-kvartirasini berishga tayyor, biroq bunday so‘rov haligacha olinmagan.
Bu haqda jurnalistlar uchun o‘tkazilgan brifingda tashkilot bosh kotibi vakili o‘rinbosari Stefani Tremble ma’lum qildi.
Uning ta’kidlashicha, BMT shtab-kvartirasida sammit o‘tkazish masalasi muhokama qilinmagan yoki so‘ralmagan. "Hozircha bu uchrashuvni rejalashtirayotganlar tomonidan ko‘rib chiqilayotgan variant deb o‘ylamayman", dedi u.
Shu bilan birga, Tremble BMT eshiklari muloqot uchun "doimo ochiq" ekanligini ta’kidladi. "Biz har doim muloqotni rag‘batlantiramiz va oxir-oqibatda BMT Nizomiga muvofiq Ukrainadagi jangovar harakatlarni to‘xtatish yo‘lida muvaffaqiyatga erishishiga umid qilamiz”, — deya qo‘shimcha qildi Tremble.
