BMT Sudandagi gumanitar vaziyatni “halokatli” deb atadi

Sudan tinch aholisi uchun og‘ir ahvol so‘nggi haftalarda faqat yomonlashdi.

Bu haqda BMT Favqulodda vaziyatlarda yordam ko‘rsatish bo‘yicha muvofiqlashtiruvchisi va Bosh kotib o‘rinbosari Tom Fletcher nomidan Xavfsizlik kengashi yig‘ilishida so‘zlagan Gumanitar masalalarni muvofiqlashtirish boshqarmasi (OCHA) vakili Edem Vosornu ogohlantirdi.

Uning so‘zlariga ko‘ra, 12 milliondan ortiq Sudan aholisi o‘z uylarini tark etishga majbur bo‘lgan, ulardan 3,4 millioni qo‘shni davlatlarga qochib ketgan. Sudan aholisining yarmidan ko‘pi - 24,6 million kishi ochlikdan azob chekmoqda, dedi BMT Qochqinlar bo‘yicha Oliy komissarligi vakili.