BMT: Dunyoda qashshoqlikda yashayotganlar soni 1,2 milliardga yetdi

Dunyoda o‘ta ko‘p o‘lchovli qashshoqlik sharoitida yashayotgan odamlar soni 1,2 milliardga yetdi. Bu haqda BMT Taraqqiyot dasturi va Oksford universitetining 2026 yilgi hisobotida ma’lum qilindi.

Hisobotga ko‘ra, avvalgi tadqiqot bilan taqqoslaganda, qashshoqlikda yashayotganlar soni 51,5 million kishiga ko‘paygan. Ularning 617 millionini bolalar tashkil etadi. Shuningdek, qashshoq aholining 83 foizi qishloq joylarda istiqomat qiladi.

Tadqiqot dunyo aholisining 78 foizi yashaydigan 108 ta mamlakatni qamrab olgan. Unda qayd etilishicha, qashshoqlik nafaqat daromad yetishmasligi, balki ochlik, ta’lim olish imkoniyati cheklangani, toza ichimlik suvi va elektr energiyasi tanqisligi kabi muammolar bilan ham bog‘liq.

BMT Taraqqiyot dasturi rahbari Aleksandr De Kru qashshoqlikning ortishi butun dunyo uchun jiddiy ogohlantirish bo‘lishi kerakligini ta’kidladi.

Hisobotda qashshoqlar soni ko‘payishining bir qismi aholi o‘sishi bilan izohlangan. Joriy yilda yangi so‘rovlar o‘tkazilmagan 95 ta mamlakat bo‘yicha aholi sonining yangilangan hisob-kitoblari qashshoqlar sonining taxminiy ko‘rsatkichini 15,8 million kishiga oshirgan.

Shu bilan birga, ayrim davlatlarda qashshoqlikni kamaytirishga erishilgan. Misr, Nepal va Tojikistonda qashshoq aholi ulushi ham, ularning mutlaq soni ham qisqargan. Xitoyda esa ko‘p o‘lchovli qashshoqlikda yashayotgan aholi ulushi 2010–2014 yillarda 9,5 foizdan 4,2 foizga tushgan.