BMT Bosh Assambleyasi Falastin davlatini tan olish nazarda tutilgan deklarasiyani qo‘llab-quvvatladi

BMT Bosh Assambleyasi 12 sentyabr kuni ko‘pchilik ovoz bilan Isroil va Falastin davlatlari to‘g‘risidagi qarorni amalga oshirish bo‘yicha qadamlarni nazarda tutuvchi deklarasiyani ma’qulladi, deya xabar bermoqda Turkiyaning TRT nashri.

Ma’lum qilinishicha, 7 sahifadan iborat hujjat iyul oyida BMT bosh qarorgohida Saudiya Arabistoni va Fransiya tomonidan tashkil etilgan xalqaro konferensiyada tayyorlangan.

"G‘azodagi urushni to‘xtatish kontekstida HAMAS sektordagi hukmronligini to‘xtatishi va suveren va mustaqil Falastin davlatini yaratish maqsadiga erishish uchun xalqaro qo‘llab-quvvatlash va ishtirokda Falastin ma’muriyatiga qurol topshirishi kerak", deyiladi deklarasiyada.

Deklarasiyani qo‘llab-quvvatlovchi rezolyusiyani 142 davlat yoqladi, 10 davlat qarshi chiqdi, yana 12 davlat betaraf qoldi. AQSh va Isroil uni boykot qildi.