“Bitkoin hech narsa ishlab chiqarmaydi”

Avstraliyalik senator bitkoinni tanqid qilib, uni "piramida sxemasi" deb atadi.

Avstraliyalik senator Jerard Rennik bitkoinni “piramida sxemasi” deb atadi, bu izoh darhol kriptovalyuta sanoati vakillari va foydalanuvchilarining salbiy munosabatini keltirib chiqardi, deb xabar beradi Crypto News.

— Oxir-oqibat, bitkoin 1 million dollargacha ko‘tariladi. Nega? Chunki bu moliyaviy piramida bo‘lib, u yerda BlackRock cheklangan ta’minotga ega bo‘lgan mahsulotga tobora ko‘proq dollar to‘kmoqda. Bu mahsulot aniq nimani ishlab chiqaradi? Hech narsa - uni sotib olayotgan va sotayotgan odamlar kabi, — deb yozgan Jerard Rennik X (sobiq Twitter) platformasida.

Kvinslenddan saylangan senator Rennik 2024 yilda Liberal Milliy partiyani tark etganidan so‘ng, birinchi populistik partiyani boshqarmoqda. U yana bitkoin va uni sotuvchi treyderlar "mutlaqo foyda keltirmasligi"ni aytdi.

— Avstraliyaga moliyaviy muhandislar emas, haqiqiy muhandislar kerak. Bizga muhim xizmatlarni taqdim etuvchi tizimlar kerak: energiya, suv va transport kabi infratuzilma, — dedi Jerard Rennik.

Rennikning bayonoti Avstraliya Bosh vaziri Entoni Albaneze Endryu Charltonni fan, texnologiya va raqamli iqtisodiyot bo‘yicha vazir yordamchisi etib tayinlaganidan ikki hafta o‘tib chiqdi. Charlton Avstraliyada raqamli aktivlarni tartibga solish, jumladan, yirik kriptovalyuta birjalariga mamlakatning moliyaviy xizmatlarni lisenziyalash tizimi ostida ishlashga imkon beruvchi lisenziyalash rejimini nazorat qilishi kutilmoqda. Qonun loyihasi joriy yilning oxirigacha kiritilishi mumkin.