Bir yil davomida qoida buzmagan haydovchi rag‘batlantiriladi

O‘zbekistonda yo‘l harakati qoidabuzarliklarini jarima ballari asosida baholash tartibi joriy etilmoqda.
Bu borada e’lon qilingan Hukumat qarori loyihsiga ko‘ra, o‘n ikki oy mobaynida yo‘l harakati qoidalarini buzmagan transport vositalari haydovchilariga rag‘batlantirish tariqasida, keyingi davrda yo‘l harakati qoidalarini birinchi marta buzganligi uchun birinchi jarima bali hisoblanmaydi.

Shuningdek, haydovchilarning oxirgi huquqbuzarligi uchun jarima bali hisoblangan vaqtdan boshlab, ular olti oy davomida yo‘l harakati qoidabuzarliklariga doir boshqa huquqbuzarlik sodir etmagan taqdirda, uning umumiy jarima ballaridan ikki jarima bali ayirib tashlanadi. Agar haydovchilar jarima ballarining umumiy miqdori ikki jarima balidan kam bo‘lgan taqdirda, barcha jarima ballari ayirib tashlanadi hamda jarima ballarini hisoblash muddati birinchi huquqbuzarlik sodir etilgan vaqtdan yangidan boshlanadi. (https://regulation.adliya.uz/project/5395/10169?contentLang=oz)