Bankni o‘yinchoq to‘pponcha bilan o‘marmoqchi bo‘lgan shaxs videosi e’lon qilindi

Toshkentda erkak o‘yinchoq to‘pponcha bilan bankni o‘marmoqchi bo‘lgani haqida xabar berilgandi.

Toshkent shahar IIBB hodisa sodir bo‘lgan vaqtda kuzatuv kameralariga tushib qolgan kadrlarni e’lon qildi.

Tasvirda yuziga niqob taqqan shaxs bankning xizmat ko‘rsatish shoxobchalaridan biriga o‘yinchoq to‘pponcha bilan kirib, bank xodimasini qo‘rqitadi va undan pul talab qiladi.

Bank xodimasi esa sarosimaga tushmay, tashvish tugmasini bosadi. Buni ko‘rgan erkak esa bankdan qochib chiqib ketadi. Chaqiruv asosida voqea joyiga yetib kelgan IIO xodimlari erkakni qo‘lga oldi.

"Ertalab uydan chiqqanimda nabiramning kichkina o‘yinchoq to‘pponchasi cho‘ntagimda qolib ketgan ekan. Ozgina oldi-berdim bor edi. Bilmadim nega bu ishni qildim, o‘zim ham hayronman. Qarzlar sabab tushkunlikka tushgan edim. Yunusobodga kelib, shu ishni qilib qo‘ydim. Ichkariga kirganimda, o‘zimga o‘zim aytdim, "Zokir noto‘g‘ri ish qilyapsan", deb. Keyin, o‘zim chiqib ketdim. Hech kimga tegmadim, pul ham olmadim. Hammadan uzr so‘rayman, agar kechirolsangiz, kechiring", — deydi gumonlanuvchi erkak.

Mazkur holat yuzasidan Jinoyat kodeksining 164-moddasi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.