Armanistondagi parlament saylovlari: hukumat boshqaruviga kim keladi?

7 iyun kuni Armanistonda Milliy majlis saylovlari bo‘lib o‘tadi. Bu galgi saylovlar nafaqat hukumat va muxolifat o‘rtasidagi raqobat, balki Yerevan va Moskva o‘rtasidagi geosiyosiy qarama-qarshilik sifatida ham baholanmoqda.

Bosh vazir Nikol Pashinyan boshchiligidagi hukumat mamlakatning Yevropa Ittifoqi bilan yaqinlashuvini qo‘llab-quvvatlamoqda. Pashinyan hatto zarurat tug‘ilsa, Armanistonning KXSHTdan chiqishi mumkinligini ham ma’lum qilgan.

Muxolifat esa bir nechta siyosiy kuchlardan iborat bo‘lib, ular orasida rossiyalik milliarder Samvel Karapetyan rahbarligidagi «Kuchli Armaniston» bloki, sobiq prezident Robert Kocharyan boshchiligidagi «Armaniston» bloki, tadbirkor Gagik Sarukyan partiyasi hamda sobiq ombudsman Arman Tatoyan jamoasi bor.

Pashinyan va uni qo‘llab-quvvatlovchi ommaviy axborot vositalari mazkur siyosiy kuchlarni Kreml bilan aloqadorlikda ayblamoqda. Ayniqsa, Samvel Karapetyanning Rossiyadagi biznes va siyosiy doiralar bilan yaqin munosabatlari muhokamalar markazida turibdi.

Tahlilchilar fikricha, saylov natijalari Armanistonning tashqi siyosiy yo‘nalishini belgilab berishi mumkin. Agar Pashinyan g‘alaba qozonsa, mamlakatning Yevropa bilan integrasiyasi yanada faollashishi ehtimoli yuqori. Muxolifatning muvaffaqiyati esa Rossiya bilan munosabatlarni tiklashga qaratilgan siyosatning kuchayishiga olib kelishi mumkin.

Shu tariqa, 7 iyun kuni bo‘lib o‘tadigan ovoz berish nafaqat Armaniston ichki siyosati, balki butun Janubiy Kavkazdagi geosiyosiy muvozanat uchun ham muhim ahamiyat kasb etmoqda.