Argentina futbol assosiasiyasi rahbari yirik moliyaviy firibgarlikda ayblanmoqda. Unga mamlakatdan chiqish taqiqlandi

Argentina futbol assosiasiyasi (AFA) prezidenti Klaudio Tapiya ijtimoiy sug‘urta badallarini to‘lamaslik ishi bo‘yicha prokuraturaga so‘roqqa chaqirildi.

U bilan birga tashkilot g‘aznachisi Pablo Tovigino ham ushbu ish bo‘yicha ayblanmoqda. Huquq-tartibot idoralari har ikki mutaxassisga mamlakatdan chiqib ketishni taqiqladi.

So‘roq jarayoni 5 mart kuniga belgilangan. Mazkur jinoyat ishi AFA tomonidan davlat g‘aznasiga 13 million dollar miqdoridagi ijtimoiy ajratmalar o‘tkazilmagani aniqlangach qo‘zg‘atilgan.

Bundan tashqari, tergov davomida quyidagi shubhali holatlar ham o‘rganilmoqda:

• Tapiyaning shaxsiy mulki: Unga tegishli bo‘lgan, maydoni 10 gektarni tashkil etuvchi va vertolyot maydonchasiga ega bo‘lgan hashamatli hovli.

• Mukofot pullari: Futbolchilarga to‘langan bonuslar miqdori rahbariyatning dunyo bo‘ylab parvozlari uchun sarflangan xarajatlardan ancha kamligi prokuratura e’tiborini tortgan.

Eslatib o‘tamiz, avvalroq ushbu tergov harakatlari sababli Argentina terma jamoasi JCH-2026 dan chetlatilishi mumkinligi haqida xabarlar tarqalgan edi, biroq FIFA hozircha vaziyatni kuzatish bilan cheklanmoqda.