AQShda Xitoyni tahdid sifatida ko‘radigan amerikaliklar soni kamaydi

AQShda yaqinda o‘tkazilgan so‘rovnoma natijalariga ko‘ra, amerikaliklarning 57 foizi Qo‘shma Shtatlar Xitoy bilan do‘stona munosabatlarni o‘rnatishi, hamkorlik va muloqotni davom ettirishi kerak, deb hisoblaydi.

Bu haqda Xinhua axborot agentligi Chikago Global ishlar bo‘yicha kengashining (Chicago Council on Global Affairs) yangi hisobotiga tayanib xabar berdi.

So‘rovnoma natijalari shuni ko‘rsatdiki, Amerika jamiyatida Xitoy bilan o‘zaro aloqalarni qo‘llab-quvvatlash tendensiyasi 2024 yildan beri asta-sekin o‘sib bormoqda.

Kengashning 2025 yilgi so‘rovnomasida Xitoy bilan aloqalarni rivojlantirishni qo‘llab-quvvatlash asosan Demokratik partiya tarafdorlari tomonidan bildirilgan. Bu yilgi tadqiqot esa shuni ko‘rsatdiki, bu qarash Respublikachilar partiyasi tarafdorlari orasida ham kuchaygan.

Xususan, Xitoy bilan do‘stona hamkorlik va o‘zaro ta’sirni qo‘llab-quvvatlovchi respublikachilar ulushi 2025 yilga nisbatan 10 foiz punktga o‘sib, 2019 yildan beri eng yuqori ko‘rsatkichga yetdi.

Hisobot mualliflarining fikriga ko‘ra, amerikaliklarning Xitoy bilan hamkorlikni tobora ko‘proq qo‘llab-quvvatlashining asosiy sabablaridan biri Xitoyni tahdid deb biladigan fuqarolar ulushining kamayishidir.

Bundan tashqari, 2021 yilga nisbatan Xitoyning dunyodagi obro‘si va ta’siri ortib borayotganiga ishonadigan amerikaliklar soni oshdi.

So‘rovnoma joriy yilning 10-21 iyul kunlari AQShning barcha 50 ta shtatida va Vashingtonda o‘tkazildi. Tadqiqotda 2156 nafar kattalar ishtirok etdi.