AQSh va Xitoy savdo vazirlari savdo aloqalarini muhokama qilishdi

AQSh Savdo vazirligi bayonotida aytilishicha, AQSh va Xitoy savdo vazirlari Gina Raimondo va Van Ventao payshanba kuni Vashingtonda savdo aloqalari va mamlakatlar o‘rtasidagi potensial hamkorlik sohalarini muhokama qilish uchun uchrashdi.

“Vazirlar AQSh va Xitoy o‘rtasidagi savdo munosabatlariga ta’sir etuvchi masalalarni, jumladan, ikki mamlakatdagi savdo va sarmoyaviy muhitni, shuningdek, potensial hamkorlik sohalarini ochiq va mazmunli muhokama qildilar”, — deyiladi xabarda.

Uchrashuvda, ta’kidlanganidek, amerikalik vazir Xitoy rasmiylari tomonidan mamlakatda faoliyat yuritayotgan AQSh kompaniyalariga nisbatan so‘nggi paytlarda ko‘rilayotgan chora-tadbirlar to‘lqinidan xavotir bildirdi. "Ushbu uchrashuv aloqa liniyalarini ochiq saqlash va munosabatlarimizni mas’uliyat bilan boshqarish bo‘yicha olib borilayotgan sa’y-harakatlarning bir qismi bo‘ldi", dedi vazirlik.