AQSh Ukrainani moliyalashtirishni to‘xtatdimi?

AQSh Prezidenti Donald Tramp Ukrainani moliyalashtirish masalasiga to‘xtalib, AQSh endi Kiyevni o‘z hisobidan qurol bilan ta’minlamasligini, balki qurollarni NATO orqali sotishini ta’kidladi.

Trampning bayonotlariga ko‘ra, “Biz endilikda Ukrainaga pul sarflayotganimiz yo‘q”, – dedi u. Shuningdek, Ukraina mojarosi AQShga 350 milliard dollarga tushganini, agar u prezident bo‘lganida, bunday xarajatlardan qochish mumkin bo‘lishini qayd etdi.

Ukrainadagi moliyaviy muammo:
Strana.ua nashri xabar berishicha, moliyaviy muammo Ukrainaning asosiy harbiy qiyinchiligiga aylangan. Mamlakatning moliyaviy “urush formulasi” uchta o‘zgaruvchidan iborat:

1. O‘z byudjeti daromadlari,

2. Sheriklar tomonidan taqdim etiladigan yordam,

3. Ittifoqchilar tomonidan taqchillikni moliyalashtirish.

Ukraina Tramp tomonidan grant yordamidan bosh tortilish sababli moliyaviy qiyinchiliklarga duch kelmoqda. Shuningdek, Yevropa Ittifoqining iqtisodiy qiyinchiliklari va Xitoydan dron komponentlarini sotib olish ham Ukrainaning harbiy xarajatlarini oshirmoqda.

Shatdaun va qurol yetkazib berishdagi muammolar:
Axios ma’lumotlariga ko‘ra, AQSh hukumatining faoliyati to‘xtatilishi (shatdaun) tufayli NATO ittifoqchilariga qurol yetkazib berish to‘xtatilgan. Muzlatilgan ta’minotlar orasida AMRAAM raketalari, Aegis jangovar tizimlari va HIMARS raketa tizimlari bor. Ular Polsha, Daniya va Xorvatiyaga yetkazilishi kerak edi.

Ukraina prezidenti Vladimir Zelenskiy oktyabr oyida shatdaun qurol yetkazib berishiga to‘sqinlik qilmasligini ta’kidlagan va Ukrainaning AQSh mudofaa kompaniyalari bilan 25 ta Patriot tizimi bo‘yicha shartnoma tayyorlanayotganini ma’lum qilgan. Uning so‘zlariga ko‘ra, Ukraina bu tizimlarni har yili turli miqdorda qabul qilib oladi.