AQSh puli xavfsiz, ammo Ukraina xavfsiz emas...

Ukraina va AQSh o‘rtasidagi tabiiy resurslar sohasida hamkorlik to‘g‘risidagi kelishuvda Kiyev uchun xavfsizlik kafolatlari haqidagi bandlar mavjud emas. Bu haqda hujjat matniga tayanib, The New York Times gazetasi yozmoqda. Ukrainaning harbiy yordamga bo‘lgan asosiy talabi bitimning yakuniy versiyasiga kiritilmagan.

Hujjatni AQSh moliya vaziri Skott Bessent va Ukraina Iqtisodiyot vazirligi rahbari Yuliya Svyridenko imzoladi. NYT ma’lumotlariga ko‘ra, kelishuv Rossiya bilan muzokaralar muvaffaqiyasizlikka uchragan taqdirda Amerika harbiy yordamini oshirish imkoniyatini beradi, lekin aniq majburiyatlarni o‘z ichiga olmaydi.

Politico manbalarining aytishicha, kelishuv AQSh prezidenti Donald Trampning Kreml bilan muzokaralardan noroziligi kuchaygan bir paytda amalga oshirilgan. Taklif etilgan imtiyozlarga, jumladan, Qrimni tan olish va sanksiyalarni olib tashlashga qaramay, Rossiya prezidenti Vladimir Putin Amerikaning o‘t ochishni to‘xtatish shartlarini qabul qilishga tayyorligini bildirmadi.

Oq uyda, Politico manbalariga ko‘ra, hozircha qanday davom etish bo‘yicha aniq reja yo‘q. Rossiyaga qarshi yangi sanksiyalarni joriy etish varianti ko‘rib chiqilmoqda, biroq Tramp bunga tayyormi yoki yo‘qligi noma’lum.

Tramp dastlab kelishuv AQShga Ukraina yer osti boyliklaridan 500 milliard dollar foyda keltirishini aytdi. Keyinroq u hisob-kitobni 120 milliard dollarga tushirib, kelishuvni “amerikaliklarning Ukrainaga yordam ko‘rsatish xarajatlarini qoplash” usuli deb atadi. Shu bilan birga, hujjat matnida allaqachon taqdim etilgan yordam qarz sifatida ko‘rsatilmagan.

NBC News ta’kidlaganidek, geologiya mutaxassislari Ukraina mineral boyliklarining haqiqiy qiymatiga shubha bilan qarashadi. Ularning ma’lumotlariga ko‘ra, AQSh ma’muriyati 30 yil avvalgi eskirgan geologik xaritalarga tayangan bo‘lishi mumkin. Haqiqatda, Ukrainaning noyob yer metallari zahiralari qiymati 12 milliard dollarni tashkil qilishi mumkin.

"Nodir yer metallari negadir kamdan-kam uchraydi. Ularda juda ko‘p", dedi Tramp vazirlar mahkamasi yig‘ilishida.

"Biz pullarimiz xavfsiz bo‘lgan shartnoma tuzdik va biz qazishni boshlashimiz mumkin", deya qo‘shimcha qildi u.