AQSh Kolumbiyani "qora ro‘yxat"ga kiritdi

Tramp ma’muriyati qariyb 30 yil ichida birinchi marta Kolumbiyani narkotiklarga qarshi kurashda hamkorlik qilishdan bosh tortgan davlatlar ro‘yxatiga qo‘shdi.

Bu harakat AQShning Lotin Amerikasidagi an’anaviy ittifoqchisiga nisbatan keskin tanqid bo‘lib, kokain ishlab chiqarish keskin oshgani va Oq uy va Kolumbiya prezidenti o‘rtasidagi munosabatlar yomonlashganini ta’kidladi, deb yozadi NBC News.

Kolumbiya narkotiklarga qarshi kurash bo‘yicha xalqaro majburiyatlarini bajarmaganiga qaramay, Tramp ma’muriyati sanksiyalar qo‘llashdan bosh tortdi. Bunga AQShning hayotiy muhim milliy manfaatlari sabab qilib ko‘rsatilgan.

Kolumbiya prezidenti Gustavo Petro bu qarordan afsusda ekanligini bildirdi. U bir necha bor "viski kokaindan ko‘ra ko‘proq odamni o‘ldiradi" deb aytgan. Sobiq isyonchi sifatida u ekstradisiya so‘rovlarini rad etib, Tramp ma’muriyatining immigrasiya qonunlarini kuchaytirishi va qo‘shni Venesuelada giyohvand moddalar savdosiga qarshi kurashini tanqid qilib, AQShning yuqori martabali amaldorlarini g‘azablantirdi.

BMTning Narkotiklar va jinoyatchilik bo‘yicha boshqarmasining so‘nggi hisobotiga ko‘ra, so‘nggi o‘n yil ichida koka ekiladigan maydonlar qariyb uch baravarga oshgan va 2023 yilda rekord darajadagi 253 ming gektarga yetgan. Bu Nyu-York shahridan uch barobar katta.

Ishlab chiqarish bilan bir qatorda giyohvand moddalarni musodara qilish ham keskin oshdi: joriy yilda 654 metrik tonna musodara qilindi. O‘tgan yili rekord darajadagi 884 metrik tonna giyohvand moddalar musodara qilingan.

Biroq, avvalgi hukumatlar bilan solishtirganda, Petro davrida koka ekinlarini qo‘lda yo‘q qilish sur’ati sekinlashdi: bu yil atigi 5048 gektar vayron qilingan. Bu uning konservativ o‘tmishdoshi davridagi so‘nggi yildagi 68 ming gektardan ancha kam va hatto hukumat belgilagan 30 ming gektardan ham past.

AQSh oxirgi marta Kolumbiyani ro‘yxatga 1997 yilda qo‘shgan.