Qo‘shma Shtatlar Ukrainadan mojaroni hal qilish bo‘yicha qarshi taklifni kutmoqda, uni prezident Vladimir Zelenskiy va uning jamoasi 18 avgust kuni Vashingtonda taqdim etadi. Bu haqda AQShning NATOdagi doimiy vakili Metyu Uiteker Fox News telekanaliga bergan intervyusida aytib o‘tdi.
"O‘ylaymanki, birinchi navbatda, biz Zelenskiy va uning jamoasi Oq uyga Rossiyaning Alyaskadagi taklifiga qarshi taklif bilan kelishsa, bu keyingi muhim qadam bo‘ladi", - dedi diplomat.
Avvalroq The New York Times AQSh prezidenti Donald Tramp Zelenskiy bilan telefon suhbatida tinchlik kelishuvi evaziga Donbassdagi hududlarni Rossiyaga berishni taklif qilgani haqida yozgan edi. Ukraina rahbari bu fikrni rad etdi.
