AQSH: Eronlik bosh direktor sanksiyalarni buzganlik ayblovi bilan Los-Anjeles aeroportida qo‘lga olindi

12 iyul kuni AQSh Adliya vazirligi Eron fuqarosi va bir vaqtning o‘zida AQShda doimiy yashovchi Bahrom Muhammad Ostavarini Los-Anjeles xalqaro aeroportida qo‘lga olganini e’lon qildi. Unga nisbatan xalqaro iqtisodiy sanksiyalarni buzganlik aybi qo‘yilmoqda.

66 yoshli Ostavari Santa-Monika (AQSh) va Tehron (Eron) orasida yashaydi va Eronda joylashgan muhandislik kompaniyasi — “Company A”ning asoschisi hamda bosh direktori hisoblanadi. Ushbu kompaniya Eron hukumati, jumladan, Eron Islom Jumhuriyati Temir yo‘llari uchun telekommunikasiya va temir yo‘l signalizasiya uskunalarini yetkazib berib kelgan.

Federal ayblovnomaga ko‘ra, Ostavari kamida 2018 yil mayidan 2025 yil iyuligacha AQShda ishlab chiqarilgan yuqori texnologiyali kompyuter prosessorlari, elektron jihozlar va signalizasiya uskunalarini Eronga noqonuniy ravishda eksport qilgan.

Tergovchilarga ko‘ra, u BAAda joylashgan ikki kompaniya — MH-SYS FZCO va Match Systech FZE orqali tovarlarni AQShdan xarid qilgan va ularning asl manzili Eron ekanini maxfiy saqlagan.

Ayblovlar quyidagilarni o‘z ichiga oladi:

• Xalqaro iqtisodiy favqulodda vakolatlar to‘g‘risidagi qonunni buzish uchun fitna (1 modda);

• Mazkur qonunni to‘g‘ridan‑to‘g‘ri buzish (3 modda).

Adliya vazirligi ma’lum qilishicha, Ostavari AQShda doimiy yashash huquqini 2020 yil may oyida olganidan so‘ng ham Erondagi kompaniyaga elektron mahsulotlar yetkazishni davom ettirgan. Shuningdek, u elektron xatlar orqali sanksiyalar haqida xabardor ekanini tasdiqlagan va sheriklaridan eksport nazorati xodimlariga yolg‘on ma’lumot berishni talab qilgan.

Agar u aybdor deb topilsa, har bir modda bo‘yicha 20 yilgacha ozodlikdan mahrum etilishi mumkin.

Ushbu ishni AQSh Gomeland Xavfsizlik Idorasi va Savdo vazirligi hamkorlikda tergov qilmoqda.

Mazkur qo‘lga olish AQShning Eronga qarshi 2018 yilda qayta tiklangan keng ko‘lamli sanksiyalar siyosati doirasida amalga oshirildi. Ular Vashingtonning 2015 yilgi yadroviy kelishuvdan bir tomonlama chiqishi ortidan joriy etilgan edi.