Turkiyaning Antaliya viloyatida kuchli shamol sabab yirik o‘rmon yong‘ini tez sur’atlarda tarqalmoqda. Bir qator hududlarda aholini xavfsiz joylarga evakuasiya qilish ishlari boshlangan.
Eng og‘ir vaziyat Aksum tumanida kuzatilmoqda. Yong‘in aholi yashash hududlariga yaqinlashgan. Ma’lumotlarga ko‘ra, kamida bir uy butunlay yonib ketgan.
Yong‘inni bartaraf etish ishlariga 866 nafar qutqaruvchi, 110 ta yong‘in o‘chirish texnikasi, 4 ta og‘ir texnika, 3 ta samolyot va 9 ta vertolyot jalb qilingan.
Yong‘in tarqalishining oldini olish maqsadida rasmiylar Shimoliy halqa yo‘lini, shuningdek, Antaliya–Isparta avtomobil yo‘lining bir qismini yopgan.
Qo‘shni Serik tumanida esa yong‘in oqibatida 5 ta uy vayron bo‘lgan. Issiqxonalar va qishloq xo‘jaligi yerlariga ham zarar yetgan.
Yong‘in oqibatida 3 kishi jarohatlanib, shifoxonaga yotqizilgan.
Yong‘indan ko‘tarilgan tutun Antaliya aeroportidan ham ko‘rinmoqda. Mahalliy OAV xabarlariga ko‘ra, yong‘in Lara tumanidagi mashhur mehmonxonalardan taxminan 15–20 kilometr uzoqlikda joylashgan.
Hozircha yong‘in kelib chiqishining aniq sababi ma’lum qilinmagan.
Shahnoza Mirziyoyeva Musulmon Yunusovning murojaatiga munosabat bildirdi
Dunyo xaritasi 500 yil ichida ilk bor yangilandi
💴 Adliya vazirligi O‘zbekistondagi pensiya va nafaqalar miqdorini eslatdi
