Albaniyada hukumatga qarshi namoyishlar ommaviy tartibsizliklarga aylandi

Albaniyada hukumatga qarshi talabalar namoyishlari poytaxt Tiranadan boshqa shaharlarga ham tarqaldi. Namoyishchilar bosh vazir Edi Ramaning iste’foga chiqishini talab qilmoqda.

Bir necha kunlardan beri poytaxt Tirana shahrida namoyishchilar va polisiya o‘rtasida to‘qnashuvlar yuz bermoqda. Norozilik aksiyalari mamlakatning Shkoder hamda janubdagi qirg‘oqbo‘yi shaharlarida ham o‘tkazilmoqda.

Namoyishchilar ta’lim vazirligi va bosh vazir devoni tomon yurish qildi. To‘qnashuvlar chog‘ida ularning ayrimlari axlat qutilari, avtobus bekatlari va kioskka o‘t qo‘ydi. Ayrimlari esa yo‘lakdan ko‘chirib olingan beton bloklar bilan hukumatga aloqador binolarning oynalarini sindirdi.

Namoyishchilar banklarga ham tosh otdi, bankomatlarni buzdi va bir bankka bostirib kirdi. Ba’zilari shahardagi yangi baland binolarni ham nishonga oldi. Ularning aytishicha, hukumat xorijlik me’morlar loyihalagan binolar ortida maktab va universitetlarga e’tiborsizligini yashirmoqda.

Polisiya tosh otayotgan namoyishchilarga qarshi tovushli granatalardan ham foydalandi. Poytaxt markazidagi Skanderbeg maydonida polisiya qochayotgan namoyishchilarni dubinkalar bilan urdi. Yaqin atrofda zo‘ravonlik yana avj olgani sabab parlament o‘sha kuni majlisini bekor qildi.

Polisiya 55 kishi hibsga olinganini, yana 98 kishiga jinoiy ayblov qo‘yilganini ma’lum qildi. Sog‘liqni saqlash vazirligi ma’lumotiga ko‘ra, 89 kishi jarohatlangan, ular orasida 61 nafar polisiyachi va 18 nafar namoyishchi bor.

Namoyishchilar Albaniya bosh vaziri Edi Rama iste’foga chiqishini talab qilmoqda. Ular hukumatdan ta’lim sharoitlarini yaxshilash, talabalar duch kelayotgan muammolarni hal etish va mamlakatda real o‘zgarishlar qilishni so‘ramoqda. Talabalar, ayniqsa, o‘qish to‘lovlarining yuqoriligi va universitetlardagi sharoitlardan norozi.

Albaniyada hukumatga qarshi namoyishlar may oyi oxiridan beri davom etmoqda. Noroziliklarga qirg‘oqbo‘yidagi muhofaza etiladigan tabiiy hududda hashamatli mehmonxona qurish rejalari ham sabab bo‘lgan. Loyiha AQSh prezidenti Donald Trampning qizi Ivanka Tramp va uning turmush o‘rtog‘i Jared Kushner bilan bog‘liq. Bu rejalar hukumatdagi ehtimoliy korrupsiya va qarorlar qabul qilish jarayonining shaffof emasligi yuzasidan tanqidlarga sabab bo‘lgan.