Afg‘onistonda Qo‘shtepa kanali qurilishi yakunlanish arafasida

Afg‘oniston Milliy taraqqiyot korporasiyasi ma’lumotlariga ko‘ra, ikkinchi bosqichdagi yer qazish ishlari 98 %, qirg‘oqlarni mustahkamlash ishlari esa 90,5 % bajarilgan.

Afg‘oniston sanoat va savdo vaziri Nuriddin Aziziy loyiha yakuniy bosqichga yetganini va yaqin vaqt ichida ishga tushishi kutilayotganini bildirdi.

Kanalning asosiy maqsadi — Amudaryo suvidan foydalanib, Afg‘oniston shimolidagi 500 ming gektardan ortiq quruq va o‘zlashtirilmagan yerlarni sug‘orish.
Qo‘shtepa kanalining uzunligi 281 kilometr, kengligi 100 metr, chuqurligi esa 8 metrni tashkil etadi.

Loyihaning yakunlanishi O‘zbekiston va Markaziy Osiyoning boshqa davlatlari uchun ham muhim. Chunki kanalning to‘liq quvvatda ishlashi Amudaryo suv oqimi va transchegaraviy suv taqsimotiga ta’sir qilishi mumkin.