Abduqodir Husanov Londondagi elchixonamizda bo‘ldi

Kecha mamlakatimizning Buyuk Britaniyadagi, qarorgohi London shahrida joylashgan elchixonasiga “Manchester City” a’zosi Abduqodir Husanov tashrif buyurdi.

Favqulodda va muxtor elchimiz Ravshan Usmonov bilan kechgan samimiy suhbatda yosh futbolchimizning APL top klubidagi faoliyati, sport sohasida bosib o‘tgan mashaqqatli yo‘li, qiziqishlari va diyorimizda millionlar o‘yiniga qaratilayotgan alohida e’tibor xususida so‘z bordi.

– “Manchester City” klubi himoyachisi hamyurtimiz Abduqodir Husanovga doimiy muvaffaqiyat tilaymiz, – deb yozgan diplomatimiz ijtimoiy tarmoqdagi sahifasida.

Uchrashuv yakunida legionerimiz dastxati tushirilgan 45-raqamli futbolkasini elchixona ma’muriyatiga esdalik sifatida hadya qildi.