27 noyabr kuni Ekologiya va iqlim o‘zgarishi milliy qo‘mitasi huzuridagi Chiqindilarni boshqarish va sirkulyar iqtisodiyotni rivojlantirish agentligi direktori Sharifbek Hasanov ishtirokida brifing o‘tkazildi. Brifingda ekologik-sanitariya xavfsizligini ta’minlash borasida amalga oshirilgan ishlar haqida ma’lumot berildi:
“Ayni paytda respublika bo‘yicha umumiy 1824 gektar yer maydonida, jami 228 ta chiqindi poligoni mavjud bo‘lib, shundan 199 tasi — maishiy, 15 tasi — zaharli, kimyoviy va 14 tasi — qurilish chiqindilari uchun mo‘ljallangan.
💠 2024 yil va 2025 yilning o‘tgan davrida Qoraqalpog‘iston Respublikasi, Andijon, Buxoro, Qashqadaryo, Namangan, Samarqand, Toshkent, Farg‘ona va Xorazm viloyatlaridagi jami 47 ta maishiy chiqindi poligoni rekultivasiya qilinib, faoliyati to‘xtatildi.
✅ Ushbu sa’y-harakatlar natijasida umumiy hisobda 243 gektar yer maydoni tabiatga qaytarildi. Respublika bo‘yicha foydalanishda bo‘lgan 132 ta chiqindi poligonlarida doimiy ravishda tuproq qatlami bilan yopish ishlari amalga oshirib kelinmoqda.
Joriy yilning “Tozalik va ozodalik oyligi” doirasida 422 ming tonnadan ortiq chiqindi tozalandi. Shuningdek, 95 mingdan ortiq mahalla hududlari, 61 mingta jamoat joyi tozalandi.
💡 9 ta hududda maishiy chiqindilarni termik qayta ishlash orqali elektr energiyasi ishlab chiqarish loyihalarini ishga tushirish borasida amaliy choralar ko‘rilmoqda. Mazkur hududlarga to‘g‘ridan-to‘g‘ri xorijiy investisiyalarni jalb etgan holda, ekologik vaziyatni yaxshilash, chiqindilarni qayta ishlash sohasida zamonaviy yechimlar va texnologiyalarni joriy etish orqali elektr energiyasi ishlab chiqarilishi belgilangan.
⚙️ Umumiy qiymati 1,3 mlrd AQSh dollari bo‘lgan ushbu investisiya loyihalarining qurilish ishlari 2027 yilda yakunlanadi. Ushbu loyihalarni ro‘yobga chiqarish orqali kuniga 13 ming tonna chiqindi qayta ishlanib, yiliga 2 mlrd kilovatt/soat elektr energiyasi ishlab chiqariladi”.
Chiqindilarni to‘g‘ri boshqarish va samarali utilizasiya qilish nafaqat hududlarimiz ko‘rki, balki atrof-muxit musaffoligi uchun ham hal qiluvchi ahamiyatga ega. Sohadagi tizimli ishlar atmosfera havosini zaharlovchi zararli gazlarning oldini oladi. Sanitar-ekologik barqarorlik ta’minlanishi turli kasalliklar o‘chog‘ini bartaraf etib, aholi salomatligi va xavfsizligini ishonchli himoya qiladi. Zero, toza hudud va “yashil” iqtisodiyotga intilish — kelajak avlodga sof tabiat va musaffo havo qoldirishning eng muhim kafolatidir.
