HAMAS: AQSh rejasiga muvofiq barcha garovdagi shaxslarni ozod qilishga tayyormiz

HAMAS harakati AQSh tomonidan taklif qilingan G‘azo mojarosini tartibga solish rejasi doirasida barcha garovda ushlab turilganlarni ozod qilishga roziligini bildirdi. Bu haqda harakatning rasmiy saytida e’lon qilingan bayonotda ma’lum qilindi.

📌 Rejaning asosiy bandlari quyidagicha:

• Urush harakatlarini to‘liq to‘xtatish;

• HAMAS tomonidan asirga olingan barcha garovdagilarni 72 soat ichida ozod qilish;

• G‘azo sektoriga vaqtinchalik tashqi boshqaruv joriy qilish;

• Mahalliy aholiga hududdan chiqib ketish yoki qayta kirish huquqini berish.

Bayonotda HAMAS quyidagilarni ta’kidladi:

«G‘azo sektorida xalqimizga qarshi olib borilayotgan tajovuz va genosid urushini to‘xtatish, milliy mas’uliyat, prinsiplar, xalqimizning huquq va manfaatlarini himoya qilish nuqtai nazaridan, HAMAS harakati rahbarlik tuzilmalari, boshqa falastinlik harakatlar hamda vositachilar bilan maslahatlashuvlar o‘tkazdi.»

Natijada harakat quyidagi pozisiyani bildirdi:

• HAMAS AQSh Prezidenti Donald Tramp tomonidan ilgari surilgan — urushni to‘xtatish, garovdagilar almashinuvi, insonparvarlik yordamini yetkazish va G‘azo sektoridagi bosqinni to‘xtatishga qaratilgan — sa’y-harakatlarni mamnuniyat bilan qabul qiladi;

• Bu doirada, HAMAS barcha garovdagilarni — tirik yoki vafot etganlarini — ozod qilishga rozilik bildirdi, bunda zarur shart-sharoitlar ta’minlanishi lozim;

• Harakat vositachilar orqali muzokaralarni boshlashga tayyor ekanini bildirdi;

• HAMAS G‘azo sektori boshqaruvini arab va islomiy davlatlar yordamida mustaqil mutaxassislardan iborat milliy kelishuv asosida tashkil etiladigan falastinlik vaqtinchalik ma’muriyatga topshirishga rozi bo‘ldi;

• Rejaning boshqa jihatlari (G‘azoning kelajagi, falastinliklarning ajralmas huquqlari) esa xalqaro huquq va qarorlar asosida keng qamrovli milliy falastin pozisiyasi doirasida ko‘rib chiqilishi lozim.