Saida Mirziyoyeva Qirg‘iziston Prezidenti bilan uchrashdi

Uchrashuvda ikki xalqni o‘zaro ishonch va hurmat asosida taraqqiyot va farovonlikka intilish birlashtirayotgani alohida ta’kidlandi.

Prezident Administrasiyasi rahbari Saida Mirziyoyeva Qirg‘iz Respublikasi Prezidenti Sadir Japarov bilan uchrashuv o‘tkazdi.

“Uchrashuvda xalqlarimizni o‘zaro ishonch va hurmat asosida taraqqiyot va farovonlikka intilish birlashtirayotgani alohida ta’kidlandi. Mamlakatimiz Prezidenti Shavkat Mirziyoyev Qirg‘iziston bilan eng yaqin qo‘shni va strategik hamkor sifatida munosabatlarni mustahkamlashga alohida ahamiyat qaratadi.

Chegara masalalari bo‘yicha muvaffaqiyatli kelishuvlar, milliy ID hujjatlarini o‘zaro tan olish, qo‘shma korxonalar hamda Qambarota GES-1 va Xitoy – Qirg‘iziston – O‘zbekiston temir yo‘li kabi yirik umumiy loyihalar buning yaqqol tasdig‘idir.

Uchrashuvda mamlakatlarimizda o‘tkazilayotgan «Zakovat» intellektual o‘yini musobaqalari ham e’tirof etildi. Bu loyiha yoshlarimiz o‘rtasida do‘stona aloqalarni mustahkamlashga xizmat qilayotgan juda samarali tashabbus sifatida qayd etildi.

O‘zbekiston va Qirg‘izistonni asrlar davomida shakllangan qardoshlik va qo‘shnichilik rishtalari birlashtirib turadi. Biz ularni qadrlaymiz va kelgusida yanada mustahkamlaymiz”, deb yozdi Mirziyoyeva o‘z sahifasida.