G‘azo sektorida bolalar ochlikdan o‘lmoqda - OAV

Bu haqda The New York Times xabar qilmoqda.

"Hozirda G‘azoda ochlikdan aziyat chekmagan odam yo‘q, jumladan men ham", - deydi G‘azo janubidagi shifoxonaning pediatriya bo‘limi mudiri doktor Ahmad al-Farra. Uning bemorlaridan biri, sog‘lom tug‘ilgan 11 oylik Sivar Barbakning vazni hozirda talab qilingan 9 kilogramm o‘rniga 4,7 kilogrammdan kam.

BMT ma’lumotlariga ko‘ra, G‘azodagi har uchdan bir kishi bir necha kun davomida oziq-ovqatsiz qolmoqda. Anklav Sog‘liqni saqlash vazirligi so‘nggi bir oy ichida 40 dan ortiq odam ochlikdan o‘lganini ma’lum qildi, ulardan 16 tasi bolalar.

Mart oyida Isroil harbiy amaliyotlarini qayta boshlagan va G‘azo blokadasini kuchaytirgan edi. Gumanitar tashkilotlar karvonlari G‘azoga yetib kela olmayapti. Isroil, o‘z navbatida, XAMASni ocharchilik haqida afsona yaratganlikda ayblab, jangarilarning o‘zlari yuk mashinalarini o‘g‘irlab, sun’iy tanqislik yaratayotganini da’vo qilmoqda.