Memorandum imzolandi: Germaniya O‘zbekistonda yashil shaharlarni rivojlantirishni qo‘llab-quvvatlaydi

«Eco Expo Central Asia 2025» xalqaro ekologik texnologiyalar ko‘rgazmasi doirasida «Markaziy Osiyoda shaharlarning barqaror va iqlimga mos rivojlanishi» nomli mintaqaviy loyihaning boshlanishiga bag‘ishlangan parallel tadbir bo‘lib o‘tdi. Ushbu tashabbus Germaniya Xalqaro hamkorlik tashkiloti (GIZ) ko‘magi bilan amalga oshirilmoqda va O‘zbekiston, Qirg‘iziston hamda Tojikistonni yashil va barqaror shaharsozlik rivojlanishini ilgari surishda birlashtirmoqda.

Tadbirning ochilish marosimida so‘zga chiqqan O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov shaharlarni iqlimga mos tarzda rivojlantirish muhim ekanligini qayd etdi.

«Shaharlarni iqlimga mos tarzda rivojlantirish nafaqat ekologik, balki iqtisodiy barqarorlik, jamiyat farovonligi va fuqarolarning salomatligi uchun ham muhimdir. Ushbu tashabbus Farg‘ona vodiysidagi shaharlarni qamrab oladi, chunki u yerda o‘sib borayotgan shaharsozlik tezkor va barqaror yechimlarni talab qilmoqda», — dedi vazir.

Vazir loyiha «Eco Expo» dasturiga to‘liq mos kelishini, bu esa xalqaro hamkorlik, innovasiyalar va barqaror kelajak bo‘yicha umumiy qarashlarni shakllantirishga qaratilganini ta’kidladi.

Tadbir doirasida O‘zbekiston Respublikasi Ekologiya vazirligi va GIZ o‘rtasida Anglashuv Memorandumi imzolandi. Ushbu hujjat atrof-muhitni muhofaza qilish, iqlim o‘zgarishiga qarshi kurash va tabiiy resurslardan barqaror foydalanish sohalarida hamkorlik yo‘nalishlarini belgilaydi.

Memorandumga muvofiq tomonlar O‘zbekistonning xalqaro ekologik majburiyatlarini amalga oshirishda harakatlarni muvofiqlashtirish, strategik hujjatlarni ishlab chiqishni qo‘llab-quvvatlash va xalqaro iqlim moliyalashtirishiga kirishni ta’minlash bo‘yicha kelishib oldilar. Asosiy vazifalardan biri Farg‘ona vodiysidagi — Farg‘ona, Namangan, Andijon, Marg‘ilon va Qo‘qon shaharlari uchun mahalliy hokimiyatlar, aholi va biznes vakillari ishtirokida muhim loyihalarni amalga oshirish hisoblanadi.

Loyiha Germaniya hukumati tomonidan ilgari surilayotgan «Green Central Asia» tashabbusi doirasidagi ishlarning bir qismi hisoblanadi. Bu mintaqaviy darajada muvofiqlashtirilgan yondashuvni ta’minlab, eng yaxshi xalqaro tajribalarni qo‘llash imkonini beradi.