Зеленский: Трамп билан Украина осмонини ҳимоя қилиш бўйича келишиб олдик

Бу суҳбат АҚШнинг Украинага қурол етказиб беришни вақтинча тўхтатиши ва Трампнинг Путин билан телефон орқали мулоқотидан сўнг содир бўлди.

Украина президенти Владимир Зеленский АҚШ президенти Дональд Трамп билан телефон орқали суҳбатлашди. Бу ҳақда у ижтимоий тармоқдаги саҳифасида хабар берди.

Зеленский Трампни АҚШ мустақиллик куни билан табриклаб, Украинага кўрсатилаётган ёрдам учун миннатдорлик билдирди. Унинг сўзларига кўра, бу ёрдам "Украина мустақиллигини ҳимоя қилиш ва инсонлар ҳаётини сақлаб қолишга ёрдам бераяпти".

Суҳбат чоғида икки томон фронтдаги вазият ва Россиянинг сўнгги зарбалари оқибатларини муҳокама қилди. Зеленский ҳаводан ҳимояни кучайтириш зарурлигини таъкидлаб, шу йўналишда ҳамкорлик қилиш бўйича келишувга эришилганини билдирди.

Шунингдек, суҳбатда беспилотник технологиялари соҳасида АҚШ билан қўшма мудофаа ишлаб чиқариш лойиҳалари муҳокама қилинди. Зеленский АҚШ билан тўғридан-тўғри саноат ва инвестиция лойиҳаларига ҳам тайёр эканини айтди.

Суҳбатда қурол-яроғ хариди, мудофаа саноатини ривожлантириш ва халқаро дипломатик ҳамкорлик масалалари ҳам кўтарилди. Зеленский Америка томонининг тинчлик йўлидаги таклифларини қўллаб-қувватлаб, адолатли келишувга эришиш зарурлигини таъкидлади.

Ушбу суҳбат Трампнинг Россия президенти Владимир Путин билан "ҳафсаласи пир бўлган" мулоқотидан бир кун ўтиб амалга ошди. Шу пайтда Киев АҚШ қуроллари етказиб беришда тўхталиб қолган ҳолатга дуч келди — Пентагон маълумотига кўра, қурол экспорти вақтинча бир неча мамлакатлар, жумладан Украина учун ҳам тўхтатилган.