Зеленский Россия билан тўғридан-тўғри музокаралар ўтказиш шартини айтди

Украина Президенти Владимир Зеленский Киев Москва билан тўғридан-тўғри музокараларни фақат ўт очишни тўхтатиш шарти билан бошлашга тайёрлигини айтди.

Кремль аввалроқ Украина Россия билан тўғридан-тўғри алоқалар йўлидаги тўсиқларни қонуний равишда “тозалаши” кераклигини таъкидлаган эди.

“Ўт очиш тўхтатилгандан кейин биз исталган форматда музокаралар столига ўтиришга тайёрмиз”, деди Владимир Зеленский журналистларга (AFP иқтибос келтирган). Унинг сўзларига кўра, шундан сўнг ҳарбий ҳаракатларни тўлиқ тугатиш бўйича кейинги босқичларга ўтиш мумкин бўлади.

ОАВ хабарига кўра, АҚШ тинчлик режасига Украинанинг НАТОга аъзо бўлишдан бош тортиши ва Қримни Россия ҳудуди сифатида тан олинишини киритишни таклиф қилмоқда. Журналистлар билан суҳбатда Владимир Зеленский Украина қонуний равишда ярим оролни Россия деб тан олмаслигини, чунки бу мамлакат конституциясига зид эканлигини айтди. НАТОга аъзолик масаласини шарҳлар экан, у Шимолий Атлантика альянсидан бошқа ҳеч ким бундай вето қўя олмаслигини айтди, деб хабар беради kommersant.ru.