Зеленский: "Россия АҚШ орқали Украина билан икки томонлама учрашувни талаб қилди"

Россия АҚШ президенти Дональд Трамп орқали Украина билан икки томонлама, кейин эса АҚШ билан уч томонлама учрашув ўтказишни талаб қилди.

Бу ҳақда Украина етакчиси Владимир Зеленский Оқ уйдаги муҳокамалардан сўнг журналистлар саволларига жавоб бериш чоғида айтиб ўтди.

Унга кўра, Киев кейинги музокаралар учун шарт сифатида ўт очишни тўхтатишни талаб қилмайди.

"АҚШ Россия томони билан боғланди, улар қандай дипломатик қадамлар қўйиш мумкинлигини муҳокама қилишди. Ва Россия аввалига Украина ва Россия ўртасида икки томонлама, кейин эса уч томонлама учрашув ўтказишни таклиф қилди. Ҳа, яхши, айтганимдек, биз етакчилар даражасидаги ҳар қандай форматга тайёрмиз... Шунинг учун мен икки томонлама учрашувга тайёр эканлигимизни тасдиқладим ва барча Европа етакчилари мени қўллаб-қувватладилар", - деди Зеленский.

Унинг таъкидлашича, Украина учун хавфсизлик кафолатлари тафсилотлари 10 кун ичида ишлаб чиқилади, ҳудудлар масаласи эса фақат Россия президенти Владимир Путин билан муҳокама қилинади.