НАТО–Россия қарама-қаршилигида сўнгги ҳафтада нималар бўлди?

🇵🇱 Польша Россиядан хавф ҳақида огоҳлантирди. Бош вазир Дональд Туск Россия НАТО давлатлари ҳудудига дрон ёки ракета киритилишига олиб келиши мумкин бўлган «гибрид ҳужумлар»га тайёрланаётгани ҳақида маълум қилди. Унинг айтишича, мақсад НАТОнинг жавоб бериш иродасини заифлаштириш бўлиши мумкин. Туск бу баёнотни НАТО, Украина ва АҚШ разведка маълумотларига таяниб берганини айтди.

🇱🇹 Литвада НАТО қирувчиси дронни уриб туширди. 15 сентябрь куни Италиянинг НАТО миссиясидаги қирувчиси Литва ҳаво ҳудудига кирган дронни йўқ қилди. Литва расмийлари дрон Беларусь томонидан киргани ва унда портловчи қурилма бўлган бўлиши мумкинлигини айтди; Италия мудофаа вазири эса уни эҳтимол Россия дрони деб баҳолади. Ҳолат бўйича текширув олиб борилмоқда.

🚢 Балтикада ҳам кескинлик ошди. 14 сентябрь куни Россия ҳарбий кемаси Дания ҳарбий-ҳаво кучларининг вертолётига икки марта сигнал ракетасини отган. Дания буни қабул қилиб бўлмайдиган ҳаракат деб атади. НАТО эса сўнгги ойларда ҳаво ҳудуди бузилиши, дронлар ва гибрид ҳаракатлар кўпайганини таъкидламоқда.

🛡 Европа мудофаага тайёргарликни кучайтирмоқда. НАТО ҳаво ҳимоясини оддий «ҳаво патрули»дан дрон, ракета, кибер ва бошқа таҳдидларни қамраб олувчи кўп қатламли тизимга ўзгартирмоқда. Германия Литвада доимий бронетехника бригадасини жойлаштиришни кучайтирмоқда, НАТО эса Шарқий қанотда кучларни тез ҳаракатлантириш ва инфратузилмани ҳимоя қилишга урғу беряпти.

🇪🇺 Европа Россияга нисбат берилаётган диверсия, киберҳужум, ёқишлар, дронлар ва дезинформация ҳолатларидан хавотир билдирмоқда. ЕК раҳбари Урсула фон дер Ляйен ҳатто НАТОнинг 4-моддасига ўхшаш, ҳарбий уруш даражасига етмаган гибрид ҳужумларга жамоавий жавоб бериш механизмини таклиф қилди. Россия эса Европа давлатларининг бундай айбловларини рад этиб келмоқда.

🇩🇪🇫🇷 Германия, Буюк Британия, Литва каби давлатлар урушга тайёргарлик кўрмоқда. Аҳолини озиқ-овқат жамлашга, шифохоналарни ярадорларни қабул қилишга тайёрламоқда. Франция президенти Макрон эса "Сўнгги ҳафталарда Россиянинг Франция ва Европага қарши гибрид таҳдиди кучайди. Ёз бошидан бери Россия Европа манфаатларига қарши ҳужумларини икки баравар оширди" деб баёнот берди.

Ҳозирча НАТО ва Россия ўртасида тўғридан-тўғри уруш бошлангани йўқ. Аммо сўнгги ҳафтада ҳаво ҳудудига киришлар, дронларни уриб тушириш, Балтикадаги инцидентлар, диверсиядан хавотир ва ҳарбий тайёргарликнинг кучайиши қарама-қаршиликнинг тобора хавфлироқ тус олаётганини кўрсатмоқда. Европа давлатлари айниқса «ҳарбий урушдан олдинги гибрид босим» сценарийига жиддий тайёргарлик кўряпти.