Юнусобод туманидаги ошхонада ёнғин юз берди

2024 йил 24 май куни Тошкент шаҳар Юнусобод туманида жойлашган ошхоналардан бирида ёнғин содир бўлди. Бу ҳақда Фавқулодда вазиятлар вазирлиги ахборот хизмати хабар берди.

Маълумотларга кўра, соат 18:40 да Отчапар кўчасидаги умумий овқатланиш масканидан ёнғин ҳақида шошилинч хабар келиб тушган.

Фавқулодда вазиятларга қарши курашиш хизматининг ёнғин-қутқарув экипажлари соат 18:48 да воқеа жойига етиб борган ва ёнғин соат 18:55 да тўлиқ бартараф этилган.

Ёнғин оқибатида жабрланганлар йўқ.

Ҳозирда ёнғин келиб чиқиш сабаби ва етказилган моддий зарар миқдори мутасадди ташкилотлар томонидан ўрганилмоқда.