Фидан Москвада Путинга Эрдўғаннинг “махфий хабар”ини етказди

Туркия ташқи ишлар вазири Ҳоқон Фидан Москвада Россия етакчиси Владимир Путин билан бўлиб ўтган музокараларнинг айрим тафсилотларини эълон қилди.

Аввалроқ, Москвада Туркия вазири Россия президентига унинг туркиялик ҳамкасби Ражаб Тоййиб Эрдўғаннинг муҳим хабарларини етказганини таъкидлаган эди.

"Биз президент Эрдўған учун муҳим бўлган жиҳатларни муҳокама қилдик. Хусусан, бу Россия-Украина можароси. Россия Федерацияси ва Украина ўртасидаги музокаралар ҳар доим самарали бўлиши муҳим, деб ҳисоблаймиз," - деди Фидан.

Унинг таъкидлашича, Туркия можарони ҳал қилишга бундан кейин ҳам қўлидан келганча ҳисса қўшишга тайёр.

Фидан сўзларига кўра, "Аккую" атом электр станциясини қуриш жараёни, юзага келган муаммолар ва уларни бартараф этиш йўллари, шунингдек, Россия газини Туркияга етказиб бериш масалалари батафсил муҳокама қилинган. Туркия вазири, шунингдек, Путин билан музокараларни жуда самарали деб атади.