Япония элчиси Россия ТИВга чақиртирилди

Путиннинг Итуруп оролига ташрифидан сўнг Япония раҳбарияти Россияга қарши баёнотлар билан чиққани юзасидан Япония элчиси Акира Муто 18 август куни Россия Федерацияси Ташқи ишлар вазирлигига чақирилди ва у ерда Япония раҳбариятининг баёнотлари муносабати билан қатъий норозилик билдирилди. Россия ташқи ишлар вазири ўринбосари Михаил Галузин дипломатга Россиянинг жанубий Курил ороллари устидан суверенитети ва юрисдикцияси бузилмас эканлигини, уларнинг мақоми Иккинчи жаҳон уруши якунлари ва халқаро ҳужжатлар билан узил-кесил мустаҳкамланганини таъкидлади. Суҳбат чоғида Россия томони Токионинг Курил ороллари жанубий қисмининг тегишлилигини шубҳа остига қўйиш уринишларини қатъиян рад этди. "Россиянинг жанубий Курил ороллари устидан суверенитети ва юрисдикцияси дахлсиз. Бу ҳудудлар Иккинчи Жаҳон уруши якунларига кўра Россияга ўтказилган. Япониянинг ушбу ҳақиқатни шубҳа остига қўйишга қаратилган ҳар қандай уринишлари мутлақо қабул қилиб бўлмайдиган ва ноқонуний", - дейилади ТИВ баёнотида. Аввалроқ, Путин биринчи марта Курилл оролларига ташриф буюргани, Япония Ташқи ишлар вазирлиги Итуруп ва бошқа шимолий ороллар мамлакатнинг “асл ҳудуди” эканини таъкидлаб, Россия президентининг ташрифига кескин норозилик билдиргани ҳақида хабар берган эдик.