Трамп Украина бўйича музокаралар муваффақиятсизликка учраган тақдирда Россияга қарши санкцияларни кучайтирадими?

АҚШ Президенти Украина бўйича музокаралар муваффақиятсизликка учраган тақдирда Россияга қарши санкцияларни кучайтириш имкониятини тан олди.

АҚШ Президенти Дональд Трамп агар Вашингтон ва Москва Россия-Украина можаросини ҳал қилиш бўйича келишувга эриша олмаса, исталган вақтда Россияга қарши санкцияларни кучайтиришга тайёрлигини маълум қилди.

Америка етакчиси бу ҳақда журналистларнинг республикачи сенатор Линдси Грэм ташаббуси билан ишлаб чиқилган қонун доирасида янги чекловларни жорий этишдан бош тортиш сабаблари ҳақидаги саволига жавоб бераётиб айтиб ўтган.

"Менда буни исталган вақтда қилиш ҳуқуқи бор. Зудлик билан. Шунинг учун, агар бу иш бермаса, мен доим буни амалга ошира оламан", — деди Трамп.

АҚШ Президенти ҳозирча қўшимча санкциялар жорий этиш ниятида эмаслигини, чунки Вашингтон Москва билан музокараларни давом эттираётганини тушунтирди.

"Музокаралар олиб бораётганингизда, бундай йўл тутмайсиз", — дея таъкидлади у.

Америка етакчиси, шунингдек, унинг Демократик ва Республикачи партиядошларининг кўпчилиги (хусусан, республикачилар) ҳозирча янги санкция чораларини қўлламаслик қарорини тушуниш билан қабул қилаётганини қайд этди.

"Мен бунга қарши чиқаётган республикачиларга ўз позициямни тушунтиряпман, лекин улар кўп эмас, чунки улар менга ишонишади", — дея қўшимча қилди Трамп.