Янгийўлда ота фарзандига 165 млн сўм алимент тўлади. Шу тариқа эркак 18 ёшгача бўлган алимент мажбуриятини олдиндан тўлиқ бажарган.

Фуқаролик ишлари бўйича Янгийўл туманлараро судининг қарорига мувофиқ, қарздор В.Ш.дан ундирувчи С.В фойдасига фарзандлари таъминоти учун алимент тўлаш белгиланган эди.

Ижро жараёнлари давомида қарздор томонидан фарзандлари вояга етгунига қадар тўланиши лозим бўлган алимент маблағлари олдиндан тўлиқ қоплаб берилди. Жами 165 миллион 766 минг сўм миқдоридаги пул маблағлари ундирувчига ўтказилди.

Мазкур ҳолатда қарздор ўз зиммасидаги мажбуриятни тўлиқ бажарди ва ижро ҳужжати белгиланган тартибда якунланди.

Фарзанд таъминоти масаласига масъулият билан ёндашиш ҳар бир ота-онанинг муҳим бурчи ҳисобланади.