Хоразм вилояти, Урганч шаҳрида ЙПХ ходимининг тўхташ ишорасига бўйсунмай, йўловчилари билан бирга қочган таксичи ушланди ва жазоланди. Бу ҳақда вилоят ИИБ хабар берди.
Қайд қилинишича, йўловчи ташиш фаолияти билан шуғулланувчи Gentra русумли автомашина ҳайдовчиси 2 май куни Урганч шаҳрининг Гурлан кўчасида йўл ҳаракати қоидаларини четлаб ўтиб, светофорнинг қизил чироғида йўлнинг қарама-қарши бўлагидан ҳаракатланган.
ЙПХ инспектори томонидан унга тўхташ ишораси берилган. Ҳайдовчи қонуний талабни бажармай, тўхтамасдан, катта тезликда ҳаракатланиб, номаълум томонга кетиб қолган.
Қайд қилинишича, автомашина ичида йўловчилар ҳам бўлган, улар ҳайдовчидан йўлда тушириб қолдиришни илтимос қилган. Ижтимоий тармоқларда тарқалган видеолавҳада автомашина олд ўриндиғидаги йўловчи ҳайдовчидан тўхташни сўрагани, бироқ, ҳайдовчи машинани тўхтатмагани, сўнгра йўловчи ойнани синдиришга урингани кўринади. Кейинчалик ҳайдовчи йўловчиларни Янгибозор туманидаги нотаниш жойга ташлаб кетган.
Шундан кейин улар ҳайдовчига нисбатан қонуний чора кўришни сўраб, Ички ишлар органларига мурожаат қилишган. Хоразм вилояти ИИБ томонидан ҳайдовчининг шахсига аниқлик киритилиб, Маъмурий жавобгарлик тўғрисидаги кодекснинг бир неча моддалари билан иш қўзғатилган, автомашинаси жарима майдонига қўйилган.
Таъкидланишича, Жиноят ишлари бўйича Урганч шаҳри суди ҳайдовчини БҲМ 12 баравари (4 млн 80 минг сўм) миқдорида жаримага тортган.