Россия ва Украина тўғридан-тўғри тинчлик музокараларининг учинчи босқичига яқинлашмоқда, аммо томонлар ўртасида ҳали ҳам жиддий келишмовчиликлар мавжуд. Жумладан, навбатдаги учрашув санаси ва асирлар алмашинуви шартлари ҳали келишилмаган.
Россия Ташқи ишлар вазири Сергей Лавров 6 июль куни Москва ва Киев навбатдаги учрашув бўйича эҳтимолий саналарни муҳокама қилаётганини тасдиқлади. Унга кўра, музокаралар мақсади вақтинча тўхташ эмас, балки барқарор тинчликка эришишдир.
Лавровнинг таъкидлашича, аввалги учрашувлар Россия ташаббуси билан ўтказилган ва ҳозирда Москва Киевдан жавоб кутаяпти. Айни пайтда, музокаралар асосан гуманитар масалаларга тааллуқли бўлган. Томонлар яраланган асирлар, 25 ёшдан кичик ҳарбийлар ва фуқаролар алмашинуви бўйича келишиб олган. Шунингдек, Украина томони боғланишни йўқотган 339 бола рўйхатини тақдим этган, Россия эса 18 нафар бола ҳақида жавоб рўйхатини тайёрламоқда.
29 июнь куни Кремль музокаралардаги сукунат учун жавобгарликни Украина ва АҚШ зиммасига юклади. Россиянинг таъкидлашича, музокаралар суръати Киевнинг позицияси, Вашингтоннинг воситачилиги ва фронтдаги вазиятга боғлиқ. Президент Владимир Путин июн ойида учинчи раундни ўтказишга тайёр эканини билдирган ва уни яна Истанбулда ўтказишни таклиф этган.
Туркия президенти Ражаб Тойиб Эрдўғон ҳам учрашувга мезбонлик қилишга тайёр эканини айтди ва Путин ҳамда Украина президенти Владимир Зеленский ўртасида, эҳтимол, Дональд Трамп иштирокида тўғридан-тўғри музокаралар ташкил қилиш ҳаракатлари кетayotganини маълум қилди.
Зеленский эса НАТОнинг Брюсселдаги сўнгги саммитида ушбу уч форматдаги музокара ғоясини қўллаб-қувватлади. У, шунингдек, Трамп билан АҚШ ҳарбий ёрдамини кучайтириш ва ҳаво мудофааси тизимлари ҳамда дронлар ишлаб чиқаришда ҳамкорлик масалаларини муҳокама қилган.
Ҳозиргача бўлиб ўтган икки учрашувда оташкесимга эришилмади — натижада фақат асирлар алмашинуви амалга ошди. Украина Ғарб ҳамкорлари ёрдамида 30 кунлик шартсиз оташкесим таклиф қилган бўлса, Россия фақат 2–3 кунлик қисқа танаффусни (ўлганлар жасадларини йиғиш учун) қабул қилишга тайёрлигини билдирган.
Музокаралар кечикаётган бир пайтда, Москва фронтдаги босимни оширмоқда ва кенг қамровли оташкесим бўйича келишувдан бош тортмоқда. Путин июнь ойида: “Бутун Украина — бизники”, — деб баёнот бериб, Сум ва Харьков вилоятларида “тампон ҳудудлар” яратиш эҳтимолини ҳам истисно қилмади.
Россия санкциялар билан таҳдид қилмоқда: нишонда Ўзбекистон ҳам бор!
Кеча Тошкентда рекорд даражадаги иссиқ ҳаво қайд этилди
Қатор давлатлар миллий ўзликка қайтиш мақсадида номини ўзгартирди
