Хитой АҚШ божларига қарши коалиция тузмоқчи — Reuters

Агентликнинг манбаларига таяниб хабар беришича, Хитой дипломатларига Қўшма Штатларнинг савдо сиёсатига қарши йўналтирилган кампанияни ишлаб чиқиш топширилган.

Маълумотларга кўра, Пекин аллақачон Вашингтоннинг иттифоқчилари бўлган Европа Иттифоқи, Япония ва Жанубий Корея билан алоқалар ўрнатган.

"Хитой раиси Си Жинпин ҳозирда жануби-шарқий Осиёдаги йирик саноат ва йиғув марказларидан бири бўлган Вьетнамда ташриф билан бўлиб турибди. Вьетнамга импорт қилинадиган маҳсулотларнинг аксарияти Хитойдан келади, мамлакатнинг асосий экспорт бозори эса АҚШ ҳисобланади. Бу Си Жинпиннинг сўнгги 18 ой ичида Ханойга иккинчи ташрифи бўлиб, ушбу ташриф Хитойнинг миллиардлаб сармоя киритган стратегик қўшниси билан муносабатларни мустаҳкамлашига қаратилган", дея таъкидлайди Reuters.

Си Жинпин Вьетнамдан сўнг Малайзия ва Камбоджага ташриф буюришни режалаштирган. Бу Пекиннинг янги иттифоқ тузишга интилиши сифатида баҳоланмоқда. Камбоджа ва Малайзия ҳам Трампнинг савдо сиёсатидан зарар кўрмоқда, мазкур давлатларнинг Қўшма Штатларга экспорт қиладиган маҳсулотларига бож ставкалари мос равишда 49 фоиз ва 24 фоизни ташкил этган.