Винисиус ва Мбаппе «Арсенал» билан ўйиндан сўнг кийиниш хонасида нималар дейишгани маълум бўлди

«Арсенал»га қарши Чемпионлар Лигаси 1/4 финалидаги йирик мағлубиятдан (0:3) сўнг «Реал» кийиниш хонасида қандай гаплар янграгани маълум бўлди.

El Chiringuito хабарига кўра, мадридликлар ҳужумчилари Винисиус Жуниор ва Килиан Мбаппе жамоага мурожаат қилишган. Шунингдек, яримҳимоячилар Федерико Валверде ва Жуд Беллингҳэм ҳам ўз фикрларини билдиришган.

Манбага кўра, футболчилар «Реал» 15 бор ЕЧЛ ғолиби эканлигини таъкидлашган. Шунингдек, юқорида номи тилга олинган футболчилар жамоа жавоб баҳсида биринчи 15 дақиқаликда гол уриши шарт эканлигини айтишган. Якунда уларнинг нутқи бошқа ўйинчилар томонидан олқишланган.

Мадриддаги жавоб беллашуви 16 апрел куни бўлиб ўтади.