Ўзбекистоннинг биринчи элчиси Босния ва Герцеговина Президиуми раисига ишонч ёрлиғини топширди

Ўзбекистоннинг Босния ва Герцеговинага тайинланган биринчи Фавқулодда ва Мухтор Элчиси Бахтиёр Ибрагимов ушбу давлат Президиуми раиси Желька Цвияновичга ишонч ёрлиғини топширди, деб хабар қилмоқда "Дунё" АА мухбири.

Тантанали маросимдан сўнг бўлиб ўтган мулоқот чоғида Ўзбекистон ва Босния ва Герцеговина ўртасидаги икки томонлама муносабатларни ривожлантириш истиқболлари муҳокама қилинди. Савдо-иқтисодий, маданий ва туризм соҳаларида ҳамкорликни мустаҳкамлаш масалаларига алоҳида эътибор қаратилди.Босния ва Герцеговина етакчиси Желька Цвиянович Ўзбекистонда Президент Шавкат Мирзиёев раҳбарлигида амалга оширилаётган кенг кўламли ислоҳотлар ва уларнинг натижаларини юқори баҳолади.

Ҳар икки томон муносабатларни сифат жиҳатидан янги босқичига олиб чиқишга тайёр эканлигини тасдиқлади.

Эслатиб ўтамиз, Бахтиёр Ибрагимов бунгача ЎзбекистоннингАвстрия, Албания ва Словакиядаги Фавқулодда ва Мухтор Элчиси сифатида аккредитация қилинган эди. Хусусан, дипломат 2023 йил ноябрь ойида Австрия Президенти Александр Ван дер Белленга, 2025 йил январь ойида Албания Президенти Байрам Бегайга ва шу йилнинг март ойида Словакия Президенти Петер Пеллегринига ўзининг ишонч ёрлиқларини топширган эди.

Шунингдек, Бахтиёр Ибрагимов 2023 йил октябрь ойида ЕХҲТ, ЮНОДC, МАГАТЭ ва Ядро синовларини кенг қамровли тақиқлаш тўғрисидаги шартнома ташкилоти каби халқаро тузилмалар ва БМТнинг Вена шаҳридаги бошқа институтларида мамлакатимизнинг расмий вакили сифатида ҳам аккредитациядан ўтган.