Курск вилоятининг Сужа шаҳридан Украина Қуролли Кучларини (УҚК) сиқиб чиқариш учун газ қувури бўйлаб судралиб ўтган "Ахмат" махсус кучлари таркибидаги "Аида" гуруҳининг аксарият аскарлари ўпка билан боғлиқ муаммолар туфайли ҳозирда касалхоналарда даволанмоқда. Бу ҳақда Россия Федерацияси Қуролли Кучлари Бош ҳарбий-сиёсий бошқармаси бошлиғи ўринбосари ва "Ахмат" махсус кучлари қўмондони генерал-лейтенант Апти Алаудинов ТАСС агентлигига хабар берди.
"Кўпчилик ҳали ҳам даволанишда, чунки бу қувурда ўтказилган вақт уларнинг ички аъзоларига жуда катта таъсир кўрсатди. Ўпка ва нафас олиш йўллари жиддий шикастланди," - деди у агентликка ва "баъзи ҳарбийлар сафга қайтганини" қўшимча қилди.
"Оқим" номи берилган операция март ойида амалга оширилди. Россиялик ҳарбийлар ишлатилмаётган газ қувури орқали 15 километрга яқин масофани босиб ўтиб, Украина Қуролли Кучларини чиқариб ташлаш учун Сужа шаҳрига кириб борди.
RTVI’нинг "Вагнер" хусусий ҳарбий компаниясининг собиқ қўмондонига таяниб хабар беришича, операцияда 800 га яқин киши иштирок этган. Бироқ, Украинанинг Днипро ОСИНТ лойиҳаси гуруҳ сонини анча камроқ - 100 нафар махсус кучлар аскари деб баҳолади. Россия Федерацияси Қуролли Кучлари Бош штаби бошлиғи Валерий Герасимовнинг таъкидлашича эса, операцияга 600 дан ортиқ ҳарбий хизматчи жалб қилинган.
Қозоғистон Россия билан урушга тайёргарлик кўрмоқдами ёки бу шунчаки ички чорами?
Хитойликлар оролни эгаллади ва тарк этди
"Эл-Класико" олдидан "Барселона" мухлислари учун хушхабар бор
