Ўзбекистонликлар Германияга қассоблик бўйича ишга таклиф этилмоқда

Германиянинг Premium Food Group ташкилоти Ўзбекистон фуқароларини ишга таклиф қилмоқда. Бу ҳақда Миграция агентлигининг Telegram’даги «Хорижда иш» эълонлар канали хабар берди.

Германия корхоналарида жами 300 та иш ўрни (Бухоро, Нукус ва Термиз минтақалари учун 100 тадан) ажратилган. Ишчилардан конвейерда ишлаш, маҳсулотларни қадоқлаш, ташиш ва ускуналарни назорат қилиш талаб этилади.

Иш вақти ҳафтасига 39 соат, синов муддати 6 ой, иш ҳақи эса тахминан 1700 еврони ташкил қилади. Тунги сменалар (23:00 дан 06:00 гача) учун 25 фоиз миқдорида устама тўланади.

Турар жой учун ойига 310 евро ушлаб қолинади. Овқатланиш харажати кунига тахминан 4 еврони ташкил этади.

Авиабилет, виза тўлови ҳамда ҳужжатларни тайёрлаш (таржима, нострификация, суғурта ва бошқалар) учун тахминан 10 млн сўм номзоднинг ўз ҳисобидан қопланади.

Дастурда иштирок этиш учун қуйидаги талабларга жавоб бериш лозим:

• 18 ёшдан 40 ёшгача бўлган эркаклар;
• олий ёки ўрта махсус маълумот тўғрисидаги диплом;
• иш тажрибаси: олий маълумотлилар учун камида 2 йил, касб-ҳунар дипломи эгалари учун 5 йиллик тасдиқланган (my.gov.uz орқали) иш стажи.
• Тил сертификати талаб этилмайди, бироқ номзодлар немис тилини мулоқот даражасида билиши ва махсус касбга йўналтирилган 4 ойлик бепул курсларда ўқиши шарт.

Номзодлар 25 апрелгача xorijdaish.uz портали орқали рўйхатдан ўтишлари керак.

Қўшимча маълумот учун 1282 қисқа рақами ёки 71 202−33−55 (ички рақам 502) телефонига қўнғироқ қилиш мумкин.