Ўзбекистонда 4 кишилик оиланинг яшаши учун қанча маблағ кераклиги ҳисоблаб чиқилди

Ўзбекистонда 4 кишилик оиланинг яшаши учун ижарани ҳисобга олмаганда қарийб 21 млн сўм керак.

Ўзбекистонда озиқ-овқатга оила бюджетининг қарийб учдан бир қисми — 30 фоизи сарфланади, бу эса озиқ-овқатни минтақанинг барча мамлакатлари орасида қиммат харажат турига айлантиради. Бу ҳақда Numbeo маълумотларида қайд этилган.

Ўзбекистонда 4 кишилик оиланинг бир ойлик ҳисобланган харажатлари ижара ҳақини ҳисобга олмаганда қарийб 21 млн сўмни ташкил этади. Бир киши учун тахминий ойлик харажатлар ижара тўловисиз 5,6 млн сўмни ташкил этади.

МДҲ мамлакатларида харажатларнинг асосий қисми муҳим эҳтиёжлар — озиқ-овқат ва уй-жойга йўналтирилади. Кийим-кечак, транспорт, спорт ва кўнгилочар машғулотларга эса анча кам маблағ сарфланаётгани ҳудуддаги оилалар ҳаётий эҳтиёжларни қондиришга кўпроқ мажбур бўлаётганидан далолат беради.

Марказий Осиёда аҳоли харажатларининг катта қисми озиқ-овқатга тўғри келмоқда. Масалан: Тожикистонда — 37,1%, Туркманистонда — 35,1%, Ўзбекистонда — 30%, Қозоғистонда — 29,6%, Қирғизистонда эса 28,5%.